ప్రతి ఇంటిపై జెండా ఎగరాలి

పుట్టపర్తి, న్యూస్‌టుడే : ఆజాదీకా అమృత్‌ మహోత్సవంలో భాగంగా హర్‌ ఘర్‌ తిరంగా కార్యక్రమంలో  ప్రతి ఇంటిపైనా జాతీయ జెండా ఎగురవేయాలని జిల్లా కలెక్టర్‌ బసంత్‌కుమార్‌ పిలుపునిచ్చారు. మున్సిపాలిటీలతోపాటు జిల్లాలోని 32 మండలాల పరిధిలోని గ్రామ, వార్డు సచివాలయాలకు 1.50 లక్షల జాతీయ జెండాలను పంపిణీ చేశామన్నారు. శనివారం మరో 80 వేలు పంపిణీ చేస్తామన్నారు. ఉపాధ్యాయులు, విద్యార్థులు తమ పరిధిలోని గ్రామ, పట్టణంలో జెండా ఎగురవేసేలా చూడాలన్నారు. దేశభక్తి ఉట్టిపడేలా హోర్డింగ్స్‌ని కూడా ఏర్పాటు చేయాలని అధికారులకు సూచించారు.