నూతన ఆవిష్కరణ వైపు దృష్టి సారించండి

మాట్లాడుతున్న ఇస్రో మాజీ ఛైర్మన్‌ కస్తూరి రంగరాజన్‌

పుట్టపర్తి, న్యూస్‌టుడే: యువత నూతన ఆవిష్కరణలపై దృష్టి సారించాలని ఇస్రో మాజీ ఛైర్మన్‌ కస్తూరి రంగరాజన్‌ పేర్కొన్నారు. శనివారం ఆయన బెంగళూరు నుంచి ప్రత్యేక కాన్వాయ్‌లో పుట్టపర్తి చేరుకున్నారు. శాంతిభవన్‌ అతిథి గృహం వద్ద ట్రస్టు వర్గాలు ఘనంగా స్వాగతం పలికాయి. సత్యసాయి విశ్వవిద్యాలయం ఆడిటోరియంలో సుందరస్వామి మెమోరియల్‌ లెక్చర్‌ సంస్థ ఆధ్వర్యంలో జరిగిన సదస్సులో ఆయన విద్యార్థులను ఉద్దేశించి ప్రసంగించారు. సత్యసాయి విశ్వవిద్యాలయాలు విద్యార్థులకు విలువల విద్యాబోధన, సంఘసేవకులుగా తీర్చిదిద్ది, సమాజానికి అందించడం అభినందనీయమన్నారు. పరిశోధనల వైపు వారితో అడుగులేసేలా పరిశోధకులు బాధ్యత తీసుకోవాలన్నారు. ఆయనను ఛాన్సలర్‌ చక్రవర్తి, ట్రస్టు సభ్యులు నాగానంద, తదితరులు ఘనంగా సన్మానించారు. శాంతి భవన్‌ అతిథి గృహంలో ట్రస్టు మేనేజింగ్‌ ట్రస్టీ ఆర్‌జే రత్నాకర్‌ మర్యాద పూర్వకంగా కలిశారు. రంగరాజన్‌ రాత్రికి శాంతిభవన్‌ అతిథి గృహంలో బసచేసి ఆదివారం ఉదయం మహాసమాధిని దర్శించుకొని బెంగళూరుకు వెళ్లనున్నారు.