టైర్‌ పంక్చరై కారు బోల్తా

భార్యాభర్త, ఇద్దరు పిల్లలకు గాయాలు

గాయపడిన తల్లి సురేఖను చూసి రోదిస్తున్న చిన్నారి స్వీటీ

సోమందేపల్లి, న్యూస్‌టుడే: మండలంలోని వెలగమేకలపల్లి మలుపు వద్ద జాతీయ రహదారిపై శనివారం సాయంత్రం టైర్‌ పంక్చర్‌ కావడంతో కారు అదుపుతప్పి ప్రమాదానికి గురైంది. బెంగళూరులో సాఫ్ట్‌వేర్‌ ఉద్యోగులుగా పనిచేస్తున్న చంద్రశేఖర్‌, సురేఖ దంపతులు తమ ఇద్దరు పిల్లలతో కలసి దైవ దర్శనం కోసం మంత్రాలయానికి మధ్యాహ్నం కారులో పయనమయ్యారు. వెలగమేకలపల్లి మలుపు వద్దకు వేగంగా చేరుకొన్న సమయంలో ఒక్కసారిగా కారు టైర్‌ పంక్చర్‌ కావడంతో అదుపుతప్పి రహదారి పక్కన బోల్తా పడింది. కారులో ఉన్న దంపతులు, పిల్లలు శృతి, స్వీటీ గాయపడ్డారని ఏఎస్సై మురళీమోహన్‌ తెలిపారు. ప్రైవేట్‌ అంబులెన్స్‌ను ఘటనా స్థలానికి రప్పించిన చంద్రశేఖర్‌..భార్యాపిల్లలను చికిత్సకు బెంగళూరుకు తరలించారు. ప్రమాదంలో తల్లి సురేఖకు ముక్కు, గడ్డం కింద గాయాలతో రక్తమోడుతున్న విషయాన్ని గమనించిన చిన్న కుమార్తె స్వీటీ భయంతో రోదించడం పలువురి మనసులను కలచివేసింది. 

ఘటనా స్థలంలో నుజ్జయిన కారు