ఆసుపత్రికి వచ్చినా నరకమే..!

కంకరతేలిన దారిపై చక్రాల కుర్చీలో బషీర్‌ను తీసుకెళుతున్న బంధువులు

ధర్మవరం, న్యూస్‌టుడే: ధర్మవరం ప్రభుత్వ ఆసుపత్రి ఆవరణలో కంకరతేలిన రహదారిపై రోగులు తీవ్ర ఇబ్బందులు పడుతున్నారు. సోమవారం బషీర్‌ అనేవ్యక్తిని చక్రాల కుర్చీపై కట్లు కట్టే గది వద్దకు తీసుకెళ్లేందుకు బంధువులు తీవ్ర ఇబ్బందులుపడ్డారు. శివానగర్‌కు చెందిన బషీˆర్‌ కాలికి గాయం కావడంతో ఆసుపత్రికి వచ్చారు. ప్రధాన గేటు వద్ద నుంచి అతడిని వీల్‌ఛైర్‌పై తీసుకెళ్లేందుకు సిబ్బంది ఎవరూ అందుబాటులో లేరు. దీంతో కుటుంబసభ్యులే తీసుకువెళ్లేందుకు పాట్లు పడ్డారు. వీల్‌ఛైర్‌ పాతది కావడం, కాలు పెట్టుకునేందుకు స్టాండు లేకపోవడం, రహదారి ఛిద్రమై కంకర తేలి ఉండటంతో వీల్‌ఛైర్‌ను ముందుకు తోయలేక ఇబ్బందుదెదురయ్యాయి. ఆసుపత్రి వద్ద ఉన్న ఓ యువకుడు గమనించి కట్లు కట్టే గది వరకు కుర్చీని తోసుకువెళ్లి సాయం చేశాడు. ఆసుపత్రి ఆవరణలో కంకరతేలిన రహదారిని మరమ్మతు చేయించాలని రోగులు కోరుతున్నారు.