జాతీయస్థాయిలో ధర్మవరం గాయనికి అవకాశం

సోమిశెట్టి సరళ

ధర్మవరం సాంస్కృతికం, న్యూస్‌టుడే: తెలుగు జానపద సంగీతాన్ని దేశవ్యాప్తంగా వినిపించే అపూర్వ అవకాశం శ్రీసత్యసాయి జిల్లా ధర్మవరానికి చెందిన సోమిశెట్టి సరళ దక్కించుకున్నారు. ప్రస్తుతం కేంద్ర ప్రభుత్వం నిర్వహిస్తున్న 75 ఏళ్ల ఆజాదికా అమృత్‌ మహోత్సవాల్లో భాగంగా ప్రసార భారతి విభాగంలోని ఆల్‌ఇండియా రేడియోశాఖ వారు దేశవ్యాప్తంగా పలు అంశాల్లో ‘ఏ’గ్రేడ్‌ కళాకారులైన 32 మందిని ఎంపిక చేశారు. వీరిలో సోమిశెట్టి సరళ ఒకరు. ఆంధ్రప్రదేశ్‌, తెలంగాణ ఉభయ రాష్ట్రాల పరిధిలో ‘ఏ’ గ్రేడ్‌ కళాకారిణి అయిన సరళను జానపద సంగీతం అంశానికి ఎంపిక చేసి రికార్డింగ్‌కు ఆహ్వానించారు. ఆమె పాడిన జానపద పాటలను నవంబరు 3న రాత్రి 9.30 నుంచి 10.30 గంటల వరకు ప్రసారం చేయనున్నామని ప్రసార భారతి సంగీత కార్యక్రమం విభాగపు అసిస్టెంట్‌ డైరక్టర్‌ డాక్టర్‌ సంతోష్‌ నహర్‌ నుంచి ఆదేశాలు వచ్చినట్లు సరళ తెలిపారు.