‘దుర్మార్గ పాలనకు చరమగీతం పాడుదాం’

గోడపత్రాలను విడుదల చేస్తున్న తెదేపా పొలిట్‌బ్యూరో సభ్యుడు కాలవ శ్రీనివాసులు తదితరులు

అనంతపురం (రాణినగర్‌), న్యూస్‌టుడే: రాష్ట్రానికి పట్టిన ఖర్మ నుంచి బయట పడటానికి, ముఖ్యమంత్రి జగన్‌మోహన్‌రెడ్డి దుర్మార్గ పాలనకు చరమగీతం పాడుదామని తెదేపా పొలిట్‌బ్యూరో సభ్యుడు కాలవ శ్రీనివాసులు పిలుపునిచ్చారు. బుధవారం జిల్లా తెదేపా కార్యాలయంలో ‘ఇదేం ఖర్మ మన రాష్ట్రానికి’ కార్యక్రమ చైతన్య పత్రాలను విడుదల చేశారు. ఈ సందర్భంగా ఆయన మాట్లాడుతూ రాష్ట్రంలో చంద్రబాబు ఎక్కడికి వెళ్లినా ప్రజలు వేల సంఖ్యలో వస్తున్నారని, దుర్మార్గపు పాలన నుంచి ఆయన కాపాడతారని అంతా విశ్వసిస్తున్నారన్నారు. అనంతపురం జిల్లాలో 45రోజుల పాటు కార్యక్రమం కొనసాగుతుందన్నారు. ప్రతి నియోజకవర్గంలో 30వేల కుటుంబాలను కలుస్తామన్నారు. కార్యక్రమంలో తెదేపా ఎస్సీసెల్‌ రాష్ట్ర అధ్యక్షుడు ఎం.ఎస్‌.రాజు, జిల్లా ప్రధానకార్యదర్శి శ్రీధర్‌చౌదరి, రాష్ట్రకార్యదర్శి ఆదినారాయణ, శింగనమల ద్విసభ్య కమిటీ సభ్యులు నరసానాయుడు, కేశవరెడ్డి పాల్గొన్నారు.