పప్పులో ఎలుక!

కమలానగర్‌, న్యూస్‌టుడే: అనంతపురం కమలానగర్‌లోని ఓ హోటల్‌లో కొన్న పప్పులో ఎలుక వచ్చిన ఘటన నగరంలో కలకలం రేపింది. ఆ హోటల్‌కు కొంతదూరంలో నివాసం ఉంటున్న జయకృష్ణ సదరు హోటల్‌లో రూ.30 పప్పు, రూ.20 చట్నీ కొనుగోలు చేశారు. ఇంటికి వెళ్లి భోజనం చేసేందుకు అన్నంలో పప్పు వేసుకున్నారు. అందులో చచ్చిన ఎలుక కనిపించింది. కంగుతిని, ఆగ్రహంతో హోటల్‌ వద్దకు అన్నం ప్లేటు తీసుకెళ్లి నిర్వాహకులకు చూపించి వాదనకు దిగారు. తమ వద్ద పప్పు కొనలేదని వారు చెప్పడంతో రూ.50 ఫోన్‌ పే చేసినట్లు బాధితుడు చూయించారు. నిర్వాహకులు ప్లేటు తీసుకుని అన్నం, పప్పు పారేశారు. నాణ్యతా, శుభ్రత పాటించని హోటళ్లపై అధికారులు చర్యలు తీసుకోవాలని స్థానికులు కోరుతున్నారు.