వీర జవానుల సేవలు చిరస్మరణీయం

హుండీలో విరాళం వేస్తున్న కలెక్టర్‌ నాగలక్ష్మి

జిల్లా సచివాలయం, న్యూస్‌టుడే: వీర మరణం పొందిన జవానుల సేవలు చిరస్మరణీయమని కలెక్టర్‌ నాగలక్ష్మి పేర్కొన్నారు. త్రిసాయుధ దళాల పతాక దినోత్సవాన్ని పురస్కరించుకుని ప్రత్యేక నిధికి విరాళాల సేకరణ ప్రక్రియను బుధవారం కలెక్టర్‌ తన బంగ్లాలో ప్రారంభించారు.  ఆమె మాట్లాడుతూ మాజీ సైనికుల సంక్షేమానికి విరాళాలు సేకరించడం అభినందనీయమన్నారు. అనంతరం వీర జవానుల కుటుంబ సభ్యులను ఘనంగా సత్కరించారు. జిల్లా సైనిక సంక్షేమాధికారి, మాజీ సైనికులు, ఎన్‌సీసీ, ఎన్‌ఎస్‌ఎస్‌ వాలంటీర్లు తదితరులు పాల్గొన్నారు.