చిట్టీలు, అప్పుల పేరుతో కుచ్చుటోపీ

పోలీసులకు ఫిర్యాదు చేస్తున్న బాధితులు

నల్లమాడ, న్యూస్‌టుడే: నల్లమాడ గ్రామానికి చెందిన వీరాంజనేయులు టీ స్టాల్‌ నడుపుతూ చిట్టీలు నిర్వహించేవాడు. అదేవిధంగా చిట్టీల మాటున ఒకరికి తెలియకుండా మరొకరితో అప్పులు కూడా చేశాడు. అయితే చిట్టీదారులు, అప్పిచ్చినవారు డబ్బు చెల్లించాలని ఒత్తిడి తేవడంతో ఈనెల 1న రాత్రికి రాత్రే ఉడాయించాడు. తాము కష్టపడి నెలనెలా పోగుచేసుకున్న సొమ్ము దాదాపు రూ.కోటిన్నర కాజేశాడని బాధితులు లబోదిబోమంటున్నారు. వారం రోజులైనా తిరిగా రాకపోవడం, కుటుంబ సభ్యులు కూడా ఎవరూ లేకపోవడంతో దాదాపు 100 మంది బాధితులు గురువారం స్థానిక పోలీస్‌స్టేషన్‌కు వెళ్లి ఎస్‌ఐ వలీబాషాకు ఫిర్యాదు చేశారు. దాదాపు 10 ఏళ్ల నుంచి నమ్మకంగా చిట్టీలు నడుపుతుండటంతో తామంతా రూ.లక్షల్లో ఇచ్చామని ఆవేదన వ్యక్తం చేశారు. ఎక్కడున్నా గాలించి సోమవారం లోపు గ్రామానికి పట్టుకొస్తామని పోలీసులు బాధితులకు తెలిపారు.