వివేకా హత్య చర్చను మళ్లించేందుకే రాజధాని డ్రామా

నిరసన తెలుపుతున్న ఏఐఎస్‌ఎఫ్‌ నాయకులు

ఆజాద్‌నగర్‌, న్యూస్‌టుడే: మాజీ మంత్రి వివేకానందరెడ్డి హత్య కేసుపై రాష్ట్ర ప్రజలు చర్చించుకుంటున్న నేపథ్యంలో దాన్ని మళ్లించడానికి సీఎం జగన్‌ విశాఖను రాజధానిగా పాలన సాగిస్తామని కొత్త డ్రామాకు తెర లేపారని ఏఐఎస్‌ఎఫ్‌ జిల్లా అధ్యక్ష, కార్యదర్శులు కుళ్లాయిస్వామి, చిరంజీవి విమర్శించారు. బుధవారం జడ్పీ ఎదురుగా ఉన్న అంబేడ్కర్‌ విగ్రహం ఎదుట ఏఐఎస్‌ఎఫ్‌ నాయకులు, విద్యార్థులు మోకాళ్లపై అర్ధనగ్న ప్రదర్శన చేస్తూ నిరసన తెలిపారు. అమరావతినే రాజధానిగా ప్రకటించేలా కేంద్రం చొరవ తీసుకోవాలని వారు డిమాండు చేశారు. కార్యక్రమంలో రమణయ్య, ఉమామహేష్‌, ఆనంద్‌, చిన్నా, నారాయణస్వామి, పవన్‌, హరి, మారుతి, విశ్వ తదితరులు పాల్గొన్నారు.