ఇంటి ముందు నీళ్లు పోస్తున్నారని ఘర్షణ

అస్వస్థతకు గురై ఒకరి మృతి

సోమరవాండ్లపల్లి (కనగానపల్లి), న్యూస్‌టుడే : ఇంటి ముందు నీళ్లు పోస్తున్నారనే విషయమై ఇరు కుటుంబాలు గొడవపడ్డారు. అందులో ఒకరు అస్వస్థతకు గురై మృతిచెందారు. ఈ ఘటన కనగానపల్లి మండలంలోని సోమరవాండ్లపల్లి గ్రామంలో బుధవారం చోటుచేసుకుంది. గ్రామానికి చెందిన శ్రీరాములు(60) వ్యవసాయం చేసుకుంటూ జీవనం సాగించేవాడు. అదే గ్రామానికి చెందిన లక్ష్మన్న కుటుంబ సభ్యులు శ్రీరాములు ఇంటి ముందు రోజూ నీళ్లు పోస్తున్నారని రెండు కుటుంబాలు గొడవపడ్డారు. ఒకరినొకరు వాదించుకునే క్రమంలో శ్రీరాములు అస్వస్థతకు గురై నేలవాలాడు. చికిత్స నిమిత్తం రామగిరి మండలంలోని ఎగువపల్లికి తన కుమారుడితో కలిసి ద్విచక్ర వాహనంలో వెళుతూ ఒక్కసారిగా రక్తపోటు అధికమై కింద పడ్డాడు. ఆటోలో ధర్మవరానికి తీసుకెళ్తుండగా మార్గమధ్యలో మృతి చెందినట్లు బంధువులు తెలిపారు.