విద్యార్థినిపై అత్యాచారం

స్నేహితురాలి తండ్రే నిందితుడు

హిందూపురం, న్యూస్‌టుడే: చిలమత్తూరు మండలంలోని ఓ గ్రామంలో 7వ తరగతి విద్యార్థినిపై ఆమె స్నేహితురాలి తండ్రి బుధవారం అత్యాచారం చేశాడు. పోలీసుల కథనం ప్రకారం... గ్రామంలో సాయంత్రం విద్యార్థులు ఆడుకొంటుండగా అదే గ్రామానికి చెందిన భవన నిర్మాణ కార్మికుడు ఈ విద్యార్థినిని మీ అమ్మ సమీప గ్రామ సచివాలయంలో ఉంది. నువ్వు సంతకం పెట్టాలని తీసుకొని రమ్మందని చెప్పి, ఎవరికీ అనుమానం రాకుండా మరో ఇద్దరు విద్యార్థినులను తన ద్విచక్ర వాహనంలో ఎక్కించుకొని వెళ్లాడు. గ్రామం దాటగానే మిగిలిన వారిని దించేసి బాలికను తీసుకెళ్లాడు. అక్కడ నుంచి గ్రామ సమీపంలోని చెరువు వద్దకు తీసుకువెళ్లి అత్యాచారానికి ఒడిగట్టాడు. గంట అనంతరం బాలికను ఇంటి వద్ద వదలి వెళ్లిపోయాడు. శరీరంపై గీతలు పడి ఉండటం, రక్తస్రావం కావడంతో బాలిక తల్లిదండ్రులకు అనుమానం వచ్చి ఆరా తీశారు. ఎవరికైనా చెబితే చంపేస్తానని చెప్పి తనపై అత్యాచారం చేసినట్లు బాలిక వెల్లడించింది. దీంతో స్థానికులు అతడిని పట్టుకొని దేహశుద్ధి చేసి చిలమత్తూరు పోలీసులకు అప్పగించారు. అతడిపై  పోక్సో కేసు నమోదు చేశారు. ఇప్పటికే పలు దొంగతనాలు, ఇతరత్రా కేసులు ఉన్నాయి.