తహసీల్దార్‌ కార్యాలయాల్లో గుడిసెలు వేస్తాం

30 గంటల సత్యాగ్రహ దీక్ష విరమణ

మాట్లాడుతున్న సీపీఎం జిల్లా కార్యదర్శి రాంభూపాల్‌

జిల్లా సచివాలయం, న్యూస్‌టుడే: ‘నిరుపేదలకు ఇంటి స్థలం ఇవ్వడానికి తహసీల్దార్లు చిన్నచూపు చూస్తున్నారు. అదే వైకాపా నేతలు అడిగిందే తడువు ఆగమేఘాలపై కబ్జా భూములకు ఎన్‌ఓసీలు ఇచ్చేస్తున్నారు. ఈనెల 8లోపు ఇంటి పట్టాలు, స్థలాలు ఇవ్వకపోతే తహసీల్దారు కార్యాలయాల్లోనే గుడిసెలు వేయిస్తాం’ అని సీపీఎం జిల్లా కార్యదర్శి రాంభూపాల్‌ హెచ్చరించారు. సీపీఎం ఆధ్వర్యంలో అనంత కలెక్టరేట్‌ ఎదుట చేపట్టిన 30 గంటల సత్యాగ్రహ దీక్ష గురువారం ముగిసింది. రాంభూపాల్‌ మాట్లాడుతూ ఎంతో కాలంగా అనేక రూపాల్లో నిరసన తెలుపుతున్నా రెవెన్యూ యంత్రాంగం ఏమాత్రం స్పందించలేదని విమర్శించారు. జిల్లాలో 68వేల ఇళ్లు నిర్మిస్తున్నామని గొప్పలు తప్ప ఏమీ ఒరగలేదన్నారు. సీఐటీయూ రాష్ట్ర ఉపాధ్యక్షుడు ఓబులు మాట్లాడుతూ ఇంటి పట్టాలు, స్థలాల కోసం అవసరమైతే ప్రాణ త్యాగానికైనా సిద్ధమేనన్నారు. సత్యాగ్రహ దీక్షకు స్పందించిన ఆర్డీఓ మధుసూదన్‌ శిబిరానికి వచ్చారు. పేదల నుంచి అర్జీలు తీసుకున్నారు. వారంలోపు సమస్యలన్నీ పరిష్కరిస్తామని హామీ ఇచ్చారు. నిరసనలో సీపీఎం జిల్లా కార్యదర్శి వర్గ సభ్యులు నల్లప్ప, శ్రీనివాసులు, నాగేంద్రకుమార్‌, బాలరంగయ్య, సావిత్రి, కృష్ణమూర్తి, తరిమెల నాగరాజు, శివకుమార్‌, రామిరెడ్డి, ఆర్‌వీ నాయుడు, ఎస్‌ఎఫ్‌ఐ రాష్ట్ర ఉపాధ్యక్షుడు సూర్యచంద్రయాదవ్‌, ప్రధాన కార్యదర్శి పరమేష్‌, డీవైఎఫ్‌ఐ కార్యదర్శి నరసింహారెడ్డి, ముస్కీన్‌వలి తదితరులు పాల్గొన్నారు.