పర్యాటకులు వస్తున్నా.. పర్యవేక్షణ శూన్యం

గుమ్మఘట్ట, న్యూస్‌టుడే: బీటీపీకి ఏళ్ల తర్వాత పూర్తిస్థాయిలో నీళ్లు చేరాయి. 8 నెలలుగా వరద నీరు వస్తూనే ఉంది. ఇప్పటికే దాదాపుగా 65 టీఎంసీలు హగరికి వదిలారు. ప్రాజెక్టు ఆంధ్ర-కర్ణాటక సరిహద్దులో ఉండటంతో రెండు ప్రాంతాల నుంచి నిత్యం 200 మంది వరకు పర్యాటకులు వస్తున్నారు. సెలవురోజుల్లో వారిసంఖ్య అధికంగా ఉంటుంది. వారికి అవసరమైన ఏర్పాట్లు లేకపోవడంతో ఇబ్బంది పడుతున్నారు. 2018లో అతిథిగృహం పరిసరాల్లో రూ.40 లక్షలు వెచ్చించి చూపరులను ఆకట్టుకునేలా మొక్కలు, ఇతర ఏర్పాట్లు చేశారు. పర్యవేక్షణ లేకపోవడంతో అవన్నీ ఎండిపోయాయి. వాటిస్థానంలో పిచ్చిమొక్కలు పెరిగి అడవిని తలపించేలా మారింది. కాపలాదారులు లేకపోవటంతో అసాంఘిక కార్యక్రమాలకు అడ్డాగా మారిందని స్థానికులు ఆవేదన వ్యక్తం చేస్తున్నారు. అధికారులు చర్యలు చేపట్టాలని, పర్యవేక్షకులను నియమించాలని కోరారు. ఇక్కడి సమస్యలపై ప్రభుత్వానికి నివేదించినట్లు డీఈ వెంకటరమణ తెలిపారు.