దళిత యువతి హత్య కేసులో నిందితుడికి రిమాండ్‌

బుక్కరాయసముద్రం: నార్పల మండలంలో దళిత యువతి హత్యకేసులో నిందితుడు జాఫర్‌ను రిమాండుకు తరలించినట్లు డీఎస్పీ ప్రసాదరెడ్డి తెలిపారు. ఆయన వివరాల ప్రకారం.. నార్పలలో ఈ నెల 5వ తేదీ నమోదైన యువతి అదృశ్యం కేసులో కాల్‌ రికార్డు ఆధారంగా జాఫర్‌పై అనుమానం వచ్చిందన్నారు. నార్పల, బుక్కరాయసముద్రం పోలీసులు నిందితుడిని అదుపులోకి తీసుకుని విచారించడంతోనే హత్య విషయం వెలుగులోకి వచ్చిందన్నారు. దీంతో యువతి అదృశ్యం కేసును నార్పల పోలీసులు హత్యకేసుగా మార్చి దర్యాప్తు చేస్తున్నారని తెలిపారు. హత్యకు గురైన యువతి వివాహం చేసుకోవాలని ఒత్తిడి చేయడంతోనే నిందితుడు జాఫర్‌ పథకం ప్రకారం ఆమెను బుక్కరాయసముద్రం చిక్కవడియార్‌ చెరువు వద్దకు తీసుకొచ్చి హత్యచేసి నీటిలో పడవేశాడన్నారు. పోస్టుమార్టం నివేదికలో మరిన్ని విషయాలు వెలుగులోకి వస్తాయన్నారు.