సర్‌డెనిమ్‌ పరిశ్రమలో భారీ అగ్ని ప్రమాదం

గోదాములో ఎగిసిపడుతున్న మంటలు

లేపాక్షి, న్యూస్‌టుడే: మండలంలోని గలిబిపల్లి క్రాస్‌ వద్దనున్న జీన్స్‌ ప్యాంట్‌ ముడి వస్త్రం తయారీ పరిశ్రమ సర్‌ డెనిమ్‌లో బుధవారం రాత్రి భారీ అగ్ని ప్రమాదం జరిగింది. రూ.కోట్లలో నష్టం వాటిల్లినట్లు అంచనా వేస్తున్నారు. ప్రమాద సమాచారాన్ని అందుకున్న హిందూపురం, మడకశిర, పెనుకొండ, పుట్టపర్తి నుంచి అగ్నిమాపక సిబ్బంది వచ్చి మంటలను అదుపు చేయడానికి ప్రయత్నాలు సాగిస్తున్నారు. ఫ్యాక్టరీలో ఉన్న బోరుబావులకు మోటార్లు అమర్చి పైపుల ద్వారా మంటలను నియంత్రిస్తున్నారు. గోదాములో షిఫ్టుకు వంద మంది కార్మికుల చొప్పున విధులు నిర్వహిస్తున్నారు. మంటలు చెలరేగిన వెంటనే కార్మికులు అప్రమత్తమై భయాందోళనతో పరుగులు తీశారు. తరచూ ఫ్యాక్టరీలో అగ్ని ప్రమాదాలు జరుగుతుండటంతో ఆందోళన వ్యక్తమవుతోంది. సంవత్సర కాలంలోనే మూడుసార్లు అగ్ని ప్రమాదాలు జరగడంపై పలు అనుమానాలు వ్యక్తమవుతున్నాయి. మూడు రోజుల క్రితం ముడి సరకు కాలి బూడిదైంది.