కోటిలింగేశ్వర ఆలయ భూమిని కాపాడతాం: తెదేపా

తహసీల్దార్‌ కార్యాలయం ఎదుట ధర్నా చేస్తున్న తెదేపా జిల్లా అధ్యక్షుడు బీకే పార్థసారథి, నాయకులు

గోరంట్ల, న్యూస్‌టుడే: దేవుని ఆస్తులు రక్షించాల్సిన ఎమ్మెల్యే శంకరనారాయణపై భక్షకుడిగా మారారని తెదేపా జిల్లా అధ్యక్షుడు, మాజీ ఎమ్మెల్యే బీకే పార్థసారథి మండిపడ్డారు. మండలంలోని బూదిలి పంచాయతీ పరిధిలో కోటిలింగేశ్వర ఆలయానికి చెందిన 4.09 ఎకరాల పొలాన్ని ఎమ్మెల్యే అనుచరులు కబ్జా చేసే ప్రయత్నాన్ని బీకే తీవ్రంగా ఖండించారు. ఆ గ్రామ సమీపంలో ఉన్న పొలాన్ని స్థానిక నాయకులతో కలిసి శుక్రవారం పరిశీలించిన అనంతరం తహసీల్దార్‌ కార్యాలయం ఎదుట ధర్నా చేసి నిరసన వ్యక్తంచేశారు. తహసీల్దార్‌ రంగనాయకులు అక్కడకు వచ్చి చర్చించారు. సర్వే నంబరు 532లో ఉన్న రైతుల పట్టాదారు పాస్‌ పుస్తకాల రద్దుకు ఆదేశించామని, ఆర్డీవో ఆధ్వర్యంలో నెలలోపు సమస్య పరిష్కారమౌతుందని తహసీల్దార్‌ సమాధానం ఇచ్చారు. అనంతరం ఆయన విలేకరులతో మాట్లాడుతూ వీరశైవులకు అండగా ఉంటామని, ఆలయ భూమిని కాపాడే బాధ్యత తెదేపాదేనని పేర్కొన్నారు. పార్టీ మండల కన్వీనర్‌ సోమశేఖర్‌, నాయకులు పాల్గొన్నారు.