మూగబోయిన ‘ఏపీ పోలీస్‌ సేవా యాప్‌’

అనంత నేరవార్తలు, న్యూస్‌టుడే : పోలీస్‌స్టేషన్‌ ద్వారా లభించే అన్ని సేవలను సులభతరంగా మార్చడానికి రాష్ట్ర ప్రభుత్వం మూడేళ్ల క్రితం ‘ఏపీ పోలీసు సేవా యాప్‌’ను అందుబాటులోకి తెచ్చింది. ఇందులో స్టేషన్‌కు వెళ్లే అవసరం లేకుండా ప్రజలకు 87 రకాల సేవలను పొందేలా రూపొందించారు. యాప్‌ ద్వారా ఫిర్యాదు , కేసుల పురోగతి, అరెస్టులు, ఎఫ్‌ఐఆర్‌లు, రికవరీలు, రోడ్డు భద్రత, మహిళా భద్రత, లైసెన్సులు ఇతర వెరిఫికేషన్లు పొందవచ్చు. ఈ యాప్‌ నుంచే వాట్సాప్‌ ఫేస్‌బుక్‌, ట్విటర్‌ ద్వారా కూడా ఫిర్యాదు చేసేలా  రూపొందించారు. ఇదంతా ఒకప్పుడు. ఈ యాప్‌ నెల రోజుల నుంచి అసలు పనిచేయడం లేదు. బాధితులు ఫిర్యాదు చేయడానికి ఆస్కారమే లేదు. దీంతో స్టేషన్‌కు వెళ్లకుండానే ఎఫ్‌ఐఆర్‌ కాపీలు పొందడానికి వీల్లేకుండా పోయింది. ప్రమాదాల్లో మృతి చెందిన వారికి బీమా కంపెనీలు, ప్రభుత్వాల నుంచి వచ్చే పరిహారాలకు ఎఫ్‌ఐఆర్‌ కాపీలు తప్పనిసరి కావడంతో అవి సకాలంలో స్టేషన్ల నుంచి అందడం లేదు. బాధితులు స్టేషన్ల నుంచి ప్రదక్షిణలు చేయాల్సి వస్తోంది.