AP News: అభిమానం ఉంచుకోండి.. నాలా తన్నులు  తినకండి

గాయపడిన వైకాపా కార్యకర్త ఆవేదన

గాయాలతో అమ్ముకుట్టి

పుంగనూరు, న్యూస్‌టుడే: ‘నాయకుల మీద అభిమానం ఉంటే గుండెల్లో పెట్టుకోండి. నాలా తన్నులు తినకండి’ అని వైకాపా కార్యకర్త ఆవేదన వ్యక్తంచేశారు. పుంగనూరు బీఎంఎస్‌ క్లబ్‌ ఆవరణలో శ్రీకృష్ణదేవరాయ బలిజ సేవాసంఘం ఆధ్వర్యంలో ఆదివారం మంత్రి పెద్దిరెడ్డి రామచంద్రారెడ్డికి ఆత్మీయ సత్కారం జరిగింది. ఈ సభావేదికపైకి వెళ్లిన తనను స్థానిక సీఐ గంగిరెడ్డి అడ్డుకొని తోయడంతో పక్కనే ఉన్న శ్రీకృష్ణదేవరాయుల విగ్రహంపై పడటంతో తలకు గాయమైందని పట్టణానికి చెందిన వైకాపా కార్యకర్త మహబూబ్‌ బాషా (అమ్ముకుట్టి) తెలిపారు. గాయపడిన తనను ఎవరూ పట్టించుకోలేదని, ఆస్పత్రికి వెళ్లినా తగిన వైద్యసేవలు అందించలేదని పేర్కొన్నారు. బలిజల సమావేశమైనా అభిమానంతో వెళ్లానని, వేదిక ఎక్కిన తనను రాకూడదని సీఐ అనడం బాధాకరమన్నారు. సీఐ గంగిరెడ్డిని వివరణ కోరగా సభావేదికపై ఎక్కువ మంది ఉండడంతో కిందకు దిగాలని చెబుతూ వస్తుండగా కార్యకర్తలు, నాయకులు దిగుతూ రద్దీలో అతను విగ్రహంపై పడ్డాడని తెలిపారు. మంత్రి వెనుక ఎవ్వరూ ఉండవద్దని చెప్పానే గాని మతాల పేరు ఎత్తలేదన్నారు.