నేను బతికే ఉన్నా

సిబ్బంది పొరపాటు.. అన్నదాతకు గ్రహపాటు

చనిపోయాడని రైతు భరోసా-పీఎం కిసాన్‌ రద్దు

ఈ చిత్రంలోని పేద రైతు పేరు పుల్లగూర మల్లప్ప (70). ఆయనది పెద్దతిప్పసముద్రం మండలం మద్దయ్యగారిపల్లె పంచాయతీ పులగంటివారిపల్లె. ఆయన బతికుండగానే.. చనిపోయినట్లు ఖాతాను ఆన్‌లైన్‌లో ఇన్‌యాక్టివ్‌ చేశారు. దీనివల్ల పదో విడతలో రావాల్సిన రైతు భరోసా-పీఎం కిసాన్‌ పథకం డబ్బులను నిలుపుదల చేశారు. ఈ పల్లెలో ఇదే పేరు కలిగిన వ్యక్తి చనిపోవడంతో స్థానిక సిబ్బంది మల్లప్ప ఆధార్‌ కార్డు నంబరు వేసి అతని ఖాతాను ఇన్‌యాక్టివ్‌ చేసినట్లు తెలిసింది. ఈ విషయం తెలిసిన రైతు మల్లప్ప మాట్లాడుతూ తాను బతికే ఉన్నానని, న్యాయం చేయాలని అభ్యర్థించారు. ఇదే నివేదికతో రేషన్‌ కార్డు, వృద్ధాప్య పింఛను రద్దు చేసి నోటికాడ కూడు లాగేస్తారేమోనని ఆయన భయపడుతున్నారు. ఎంపీడీవో గిరిధరరెడ్డిని ‘న్యూస్‌టుడే’ వివరణ కోరగా.. ఈ విషయం తన దృష్టికి వచ్చిందని, వ్యవసాయశాఖ అధికారులను సంప్రదించి బాధిత రైతుకు న్యాయం చేస్తామని పేర్కొన్నారు. - న్యూస్‌టుడే, పెద్దతిప్ప సముద్రం