కురవంకపై కన్ను

ప్రస్తుతం చదును చేశారిలా.. u 2020 నవంబరులో కురవంకలో పనులను అడ్డుకున్న అప్పటి తహసీల్దార్‌ కుప్పుసామి

న్యూస్‌టుడే, మదనపల్లె గ్రామీణ పట్టణంలోని భూముల విలువ పెరగడంతో అక్రమార్కుల కన్ను ప్రభుత్వ డీకేటీ స్థలాలు, వంకలు, చెరువుల స్థలాలపై పడుతోంది. దీనికి నిదర్శనమే కదిరిరోడ్డులోని కురవంక. గతంలో రెవెన్యూ అధికారులు దీనిని స్వాధీనం చేసుకుంటే ప్రస్తుతం మళ్లీ ఆక్రమణపర్వానికి తెరదీశారు అక్రమార్కులు. మదనపల్లె కదిరిరోడ్డులోని కురవంకలో కొందరు అక్రమంగా వంకను పూడ్చేసి వెనుక ఉన్న ఓ ఇంటి నిర్మాణానికి రోడ్డు ఏర్పాటు చేస్తున్నారని ఫిర్యాదులు వచ్చాయి. దీంతో 2020లో అప్పటి తహసీల్దార్‌ కుప్పుస్వామి, రెవెన్యూ, సర్వే అధికారులు వంకను, రెవెన్యూ దస్త్రాలు పరిశీలించి ఆక్రమణగా గుర్తించారు. ఈ మేరకు నిర్మాణాలను అడ్డుకోవడంతో పాటు, పూడికలను జేసీబీతో తొలగించారు. అనంతరం దీనిపై రెవెన్యూ, జలవనరుల శాఖ అధికారుల పర్యవేక్షణ లేకపోవడంతో తిరిగి ఆక్రమణదారులు సంబంధిత స్థలంలో మట్టి పోసి చదును చేశారు. గతంలో ప్రహరీ నిర్మించగా, నేడు వంకలోకి మట్టి తోలి 60 అడుగుల నుంచి 90 అడుగుల వెడల్పు ఉన్న వంకను కనీసం 8 అడుగులు కూడా లేకుండా ఆక్రమించేశారు. దాదాపు 10 కుంటలకు పైగా స్థలం కబ్జాబకు గురైనట్లు తెలుస్తోంది. దీని విలువ సుమారు రూ.2 కోట్లు ఉంటుందని స్థానికుల అంచనా.