రెవెన్యూ సమస్యలు పరిష్కరించండి: కలెక్టర్‌

చిత్తూరు(జిల్లా సచివాలయం), న్యూస్‌టుడే: రెవెన్యూ సమస్యలను సకాలంలో పరిష్కరించేందుకు చర్యలు తీసుకోవాలని కలెక్టర్‌ హరినారాయణన్‌ ఆదేశించారు. కలెక్టరేట్‌ నుంచి శుక్రవారం నిర్వహించిన వీడియో కాన్ఫరెన్సులో మండల అధికారులతో ఆయన మాట్లాడారు. ప్రభుత్వ భూములు, చెరువులు, కుంటలు, సామూహిక ఆస్తులు కాపాడాలని, ఎక్కడైనా ప్రభుత్వ భూములు ఆక్రమణలో ఉంటే వాటిని తక్షణమే తొలగించాలన్నారు. భూ సమస్యల పరిష్కారంలో నిర్ణయాలు తీసుకునే హక్కు తహసీల్దారుకు ఉందని, మండల స్థాయిలో ఆక్రమణ తొలగింపునకు వేగంగా చర్యలు చేపట్టాలన్నారు. జేసీ (రెవెన్యూ) రాజాబాబు మాట్లాడుతూ స్పందన, సచివాలయాల నిర్వహణ, రెవెన్యూ రికార్డులు భద్రపరచడం, భూ రికార్డుల స్వచ్ఛీకరణ, జగనన్న కాలనీలకు సంబంధించి మ్యూటేషన్‌ తదితర నివేదికలు త్వరగా సమర్పించాలన్నారు. డీఆర్‌వో మురళి మాట్లాడుతూ రిజిస్టర్‌-ఏలోని భూములపై జిల్లాలోని 480 గ్రామాల్లో చేపట్టిన సర్వే వేగవంతం చేయాలన్నారు.