Andhra News: కుప్పంలోని ఓ దాబాలో వైకాపా నాయకుల వీరంగం

ధ్వంసమైన కుర్చీలు, బల్లలు

కుప్పం పట్టణం, న్యూస్‌టుడే: కుప్పం పట్టణం బైపాస్‌ మార్గంలోని ఓ దాబాలో వైకాపా నాయకులు వీరంగం సృష్టించిన సీసీ ఫుటేజీ వీడియో ఆదివారం సామాజిక మాధ్యమాల్లో వైరలైంది. కుప్పం మున్సిపాలిటీకి చెందిన ఓ కౌన్సిలర్‌, మరో కౌన్సిలర్‌ కుమారుడు, వారి అనుచరులు దాబాపై దాడి చేసినట్లు నిర్వాహకులు తెలిపారు. నాలుగు రోజుల క్రితం వైకాపా నాయకులు దాబాకు వెళ్లగా భోజనం అయిపోయిందని నిర్వాహకులు చెప్పారు. శనివారం రాత్రి మళ్లీ వచ్చి ‘మొన్న మాకు భోజనం లేదన్నారే..’ అని దాబాలో బల్లలు, కుర్చీలు ధ్వంసం చేశారని నిర్వాహకులు ఆవేదన వ్యక్తం చేశారు. ఎక్కువ మాట్లాడితే చంపేస్తామని బెదిరించారని వాపోయారు.