కాణిపాకం ఆలయ పరిసరాల్లో శిల్పారామం

కాణిపాకంలో పర్యటిస్తున్న పర్యాటకశాఖ రీజినల్‌ డైరెక్టర్‌ మురళీకృష్ణ, ఛైర్మన్‌ మోహన్‌రెడ్డి

కాణిపాకం, న్యూస్‌టుడే: శ్రీ వరసిద్ధి వినాయకస్వామి ఆలయ పరిసరాల్లో ఏపీ పర్యాటకశాఖ ఆధ్వర్యంలో శిల్పారామం నిర్మించడానికి స్థలాన్ని పరిశీలిస్తున్నట్లు ఆ శాఖ రీజనల్‌ డైరక్టర్‌ మురళీకృష్ణ తెలిపారు. రాష్ట్ర పర్యాటకశాఖ మంత్రి ఆర్‌కే రోజా ఆదేశాల మేరకు గురువారం అధికారుల బృందం కాణిపాకంలో పర్యటించింది. ఆయన మాట్లాడుతూ కాణిపాకం పరిసరాల్లో శిల్పారామం నిర్మిస్తే భక్తులకు చాలా సౌకర్యంగా ఉంటుందన్నారు. పర్యాటకశాఖ తరఫున విశ్రాంతి భవనం నిర్మిస్తున్నట్లు తెలిపారు. భక్తుల సౌకర్యార్థం ఆలయ సమీపంలో ఉన్న చెరువులో బోటింగ్‌ ఏర్పాటుకు సన్నాహాలు చేస్తున్నామని, మూడు నెలల్లో స్థల సేకరణ చేపట్టి, వచ్చే మార్చి నాటికి శిల్పారామం నిర్మాణాన్ని పూర్తిచేస్తామన్నారు. మంత్రి రోజా దీనిపై ప్రత్యేక శ్రద్ధ తీసుకున్నారని ఆయన తెలిపారు. ఆయన వెంట ఆలయ పాలకమండలి ఛైర్మన్‌ ఎ.మోహన్‌రెడ్డి, ఈఈ వెంకట నారాయణ, తిరుపతి శిల్పారామం పరిపాలనాధికారి ఖాదర్‌వల్లి, మోహన్‌కుమార్‌ ఉన్నారు.