ఉద్యోగం ఎలా చేస్తారో చూస్తా...

గంగుడుపల్లి సచివాలయంలో సిబ్బందిని బెదిరిస్తున్న వైకాపా నాయకుడు చిరంజీవిరెడ్డి

చంద్రగిరి: నియోజకవర్గంలో వైకాపా నాయకులు సచివాలయ సిబ్బంది, వార్డు వాలంటీర్లను వేధిస్తున్నారు. నాలుగు రోజులుగా వైకాపా నాయకుడు చిరంజీవిరెడ్డి మద్యం తాగి సచివాలయంలోకి చొరబడి సచివాలయ సిబ్బందిని, గ్రామ వాలంటీర్లపై వ్యక్తిగత దూషణలకు పాల్పడుతూ ఆపై చరవాణిలో మీరెలా ఉద్యోగాలు చేస్తారో చూస్తా అంటూ బెదిరిస్తున్నారు. మూడు రోజులకు ముందు సర్పంచి ధర్మారెడ్డి కుమారుడు క్రాంతికుమార్‌రెడ్డి అతని అనుచరుడు చిరంజీవిరెడ్డి సచివాలయంలోని సిబ్బంది, వాలంటీర్లను కార్యాలయ నుంచి బయటకు గెంటేయడంతో సిబ్బంది కార్యాలయ ఆవరణలో ధర్నాచేసి ఆపై ఎంపీడీవో రమేష్‌బాబుకు ఫిర్యాదు చేసినా అధికారులు పట్టించుకోకపోవడంపై విమర్శలు వస్తున్నాయి. దీంతో సిబ్బందిపై కక్షగట్టిన వైకాపా నాయకులు వాలంటీర్లకు ఫోన్‌చేసి సోమవారం నుంచి మీరెలా ఉద్యోగాలు చేస్తారో చూస్తామంటూ బెదిరిస్తుండటంతో తమకు ఉద్యోగ భద్రత కల్పించాలని అధికారులు, మండల స్థాయి నాయకులను ఆశ్రయిస్తున్నారు.