సిరులతల్లికి స్వర్ణ శోభ

తిరుచానూరు, న్యూస్‌టుడే: తిరుచానూరు శ్రీపద్మావతీ అమ్మవారు శుక్రవారం ఉదయం సర్వభూపాల వాహనంపై ఊరేగారు. వాహనంపై వెన్నముద్ద కృష్ణుడు అలంకరణలో భక్తులకు దర్శనమిచ్చారు. శుక్రవారం సాయంత్రం స్వర్ణ రథోత్సవం కనులపండువగా జరిగింది. రథంపై శ్రీమహాలక్ష్మి రూపంలో కొలువుదీరి తిరుమాడ వీధుల్లో ఊరేగుతూ భక్తులకు దర్శనభాగ్యం కల్పించారు. రాత్రి గరుడ వాహనసేవ వేడుకగా సాగింది. శ్రీవారి పాదాలు, లక్ష్మీకాసుల హారాన్ని ధరించి అమ్మవారు భక్తులను అనుగ్రహించారు. శనివారం ఉదయం సూర్యప్రభ, రాత్రి చంద్రప్రభ వాహనసేవలు జరగనున్నాయి. వాహనసేవలో జీయ్యంగార్లు, ఎమ్మెల్యే చెవిరెడ్డి భాస్కర్‌రెడ్డి, తితిదే పాలకమండలి సభ్యులు శ్రీరాములు, పోకల అశోక్‌కుమార్‌, జేఈవో వీరబ్రహ్మం తదితరులు పాల్గొన్నారు.