లోకేశ్‌ దృష్టికి సర్పంచుల సమస్యలు

లోకేశ్‌కు వినతిపత్రం అందజేస్తున్నసర్పంచులు జనార్దన్‌రెడ్డి తదితరులు

కుప్పం, న్యూస్‌టుడే: కుప్పం నియోజకవర్గంలోని నాలుగు మండలాలకు చెందిన తెదేపా సర్పంచులు తెదేపా జాతీయ ప్రధాన కార్యదర్శి నారా లోకేశ్‌ను శుక్రవారం అమరావతిలో మర్యాదపూర్వకంగా కలిశారు. పంచాయతీల్లో నిధుల కొరత వల్ల ఎదుర్కొంటున్న ఇబ్బందులను ఆయన దృష్టికి తీసుకెళ్లారు. డ్రైనేజీ వసతి, తాగునీటి సరఫరా మెరుగుపరచడం, వీధి దీపాల నిర్వహణకు నిధుల కొరత అవరోధంగా మారిందని వివరించారు. గ్రామీణ ఉపాధి హామీ పథకం అమల్లో గ్రామ పంచాయతీలను ప్రభుత్వం విస్మరించిందని తెలిపారు. రహదారుల దుస్థితికి పరిష్కారం చూపలేకపోతున్నామని వినతిలో పేర్కొన్నారు. సర్పంచుల సమస్యలు, నిధుల కొరత విషయాన్ని ప్రభుత్వం దృష్టికి తీసుకెళ్లాలని లోకేశ్‌ను కోరినట్లు సర్పంచులు ఎద్దులింటి జనార్దన్‌రెడ్డి, మంజునాథరెడ్డి, యల్లప్ప, సంతోష్‌ తదితరులు తెలిపారు.