తాళికట్టు శుభవేళా..

ఈ నెల 18 వరకు ముహూర్తాలు

చిత్తూరు(క్రీడలు), న్యూస్‌టుడే: జిల్లాలో ప్రస్తుతం శుభ వేడుకల సందడి కనిపిస్తోంది. ప్రస్తుతం మార్గశిర మాసం నడుస్తోంది. ఈ నెలలో 18 వరకు ముహూర్తాలు ఉన్నాయి. దీంతో పెళ్లిళ్లు, గృహ ప్రవేశాలు, కొత్త ఇళ్ల భూమిపూజ.. ఇలా ఇంటిలో ఓ శుభకార్యం జరిపేందుకు ఏర్పాట్లలో తలమునకలై ఉన్నారు ప్రజలు. డిసెంబరు 2న మంచి ముహూర్తం కావడంతో చాలా పెళ్లిళ్లు జరిగాయి. ఇంకా 3, 4, 7, 8, 9, 14, 16, 17, 18 తేదీల్లోనూ ముహూర్తాలు ఉన్నాయి. చిత్తూరు జిల్లాలో వెయ్యి వరకు వివాహాలు జరగనున్నట్లు అంచనా. పుష్యమాసం డిసెంబరు 24 నుంచి జనవరి 21 వరకు ఉంటుంది. ఆ సమయంలో ఎలాంటి శుభకార్యాలు జరగవు. మంచి ముహూర్తం.. మించిన దొరకదు అన్నట్లు శుభ వేడుకలు జరిపేందుకు ఏర్పాట్లు చేసుకుంటున్నారు. పెళ్లిళ్ల నేపథ్యంలో పురోహితులకు డిమాండ్‌ ఏర్పడింది. ఇంకా కల్యాణ మండపాలు, కేటరింగ్‌, పుష్పాలం కరణ.. అనుబంధ రంగాల వారీగా జోరుగా వ్యాపారం సాగుతోంది.

అనువైన సమయం..

ఈ నెలలో 18 వరకు శుభకార్యాల నిర్వహణకు ముహూర్త బలమున్న కాలం. పుష్య మాసంలో శుభకార్యాలు చేయరు. ఆ తర్వాత మాఘ మాసంలోనే పెళ్లిళ్లకు అనువైన సమయం.

వేణుగోపాల్‌, అర్చకులు, చిత్తూరు