చిన్నశేషుడిపై కోదండరాముడు

తిరుపతి(తితిదే), న్యూస్‌టుడే: తిరుపతి శ్రీ కోదండరామస్వామి వారి బ్రహ్మోత్సవాల్లో భాగంగా రెండోరోజు మంగళవారం ఉదయం చిన్నశేష, రాత్రి హంస వాహనాలపై శ్రీరామచంద్రమూర్తి భక్తులను కనువిందు చేశారు. ఉదయం 11 నుంచి 12 గంటల వరకు కల్యాణ మండపంలో శ్రీ సీతా లక్ష్మణ సమేత శ్రీ కోదండరామ స్వామివారి ఉత్సవర్లకు స్నపన తిరుమంజనం నిర్వహించారు. వాహనసేవ ముందు వివిధ రకాల ప్రదర్శనలు, ధార్మిక కార్యక్రమాలు ఆకట్టుకున్నాయి. కార్యక్రమంలో శ్రీ పెద్దజీయర్‌ స్వామి, శ్రీ చిన్నజీయర్‌ స్వామి, ఆలయ డిప్యూటీ ఈవో నాగరత్న, వీజీవో మనోహర్‌, ఏఈవో మోహన్‌, సూపరింటెండెంట్ రమేష్‌, టెంపుల్‌ ఇన్‌స్పెక్టర్లు చలపతి, సురేష్‌, అర్చకులు ఆనంద కుమార్‌ దీక్షితులు, భక్తులు పాల్గొన్నారు.