టూరిస్ట్‌ బస్టాండ్‌ వేలంలో రూ.2.55 కోట్ల ఆదాయం

తిరుచానూరు: తిరుచానూరు టూరిస్ట్‌ బస్టాండ్‌ వేలం ద్వారా పంచాయతీకి రూ.2.55 కోట్లు ఆదాయం లభించింది. గురువారం పంచాయతీ కార్యాలయం ఆవరణలో సర్పంచి కె.రామచంద్రారెడ్డి ఆధ్వర్యంలో వేలం నిర్వహించారు. పంచాయతీ ప్రారంభ ధరగా రూ.2.27 కోట్లు నిర్ణయించి వేలం ప్రారంభించారు. వేలం దక్కించుకునేందుకు తిరుచానూరుకు చెందిన దేవేంద్రరెడ్డి, దామినేడుకు చెందిన నాగిరెడ్డి పోటీ పడ్డారు. చివరకు నాగిరెడ్డి అత్యధికంగా రూ.2.55 కోట్లు పాడి వేలాన్ని దక్కించుకున్నారు. పంచాయతీ దుకాణాలకు సంబంధించి వేలం నిర్వహించగా పోటీదారులు ముందుకు రాకపోవడంతో రద్దు చేసినట్లు ఈవోపీఆర్డీ నీలంకంఠేశ్వర్‌రెడ్డి, పంచాయతీ కార్యదర్శి లక్ష్మీనారాయణ తెలిపారు.