కలిసికట్టుగా అక్రమాన్ని అడ్డుకున్నారు

ఇసుక రవాణాను అడ్డుకుంటున్న స్థానికులు

శ్రీకాళహస్తిగ్రామీణం(ఏర్పేడు), న్యూస్‌టుడే: శ్రీకాళహస్తి మండలం సుబ్బానాయుడుకండ్రిగ సమీపంలోని సువర్ణముఖినదిలో ఇసుక తవ్వకాల కోసం అక్రమార్కులు ఏర్పాటు చేసిన దారిని స్థానికులంతా కలిసికట్టుగా గురువారం తవ్వేశారు. నది నుంచి పెద్దఎత్తున ఇసుక తరలిస్తుండగా రవాణాను అడ్డుకుని ట్రాక్టర్లను బయటకు పంపారు. జేసీబీతో నదిలోని మట్టిరోడ్డును తొలగించారు. ఇసుక తరలించేందుకు తమకు ప్రభుత్వం నుంచి అనుమతి ఉందని, ఇసుక రవాణాదారులు స్థానికులతో వాగ్వాదానికి దిగారు. అయితే ప్రభుత్వ అధికారులు వచ్చినా తమ ప్రాంతంలో తవ్వకాలు జరిపేందుకు వీలులేదని స్థానిక రైతులు తేల్చిచెప్పారు. గత కొన్నేళ్లుగా నదిలో పూర్తిస్థాయిలో ఇసుక తరలిస్తుండటంతో భూగర్భజలాలు అడుగంటి వ్యవసాయ భూములను బీడుభూములగా మార్చుకోవాల్సి వస్తుందని ఆవేదన వ్యక్తం చేశారు. దీంతో ఏర్పేడు మండలానికి చెందిన వైకాపా నేత జోక్యం చేసుకుని పోలీసులను సువర్ణముఖి నది వద్దకు పంపారు. నదిలోని రోడ్డును తవ్వేందుకు వీలులేదని స్థానికులకు పోలీసులు హెచ్చరించారు. అయితే అక్రమార్కులు నదిలో రోడ్డును ఏర్పాటు చేసి ఇసుక తరలిస్తున్న సమయంలో స్పందించని పోలీసులు ఇప్పుడు తమను బెదిరించడం తగదని స్థానికులు తెలిపారు.