అటవీ ప్రాంతంలో కారుపై దాడి: ప్రాణభయంతో కుప్పం చేరుకున్న దంపతులు

దాడిలో ధ్వంసమైన కారు అద్దం

కుప్పం పట్టణం, న్యూస్‌టుడే: చిత్తూరు జిల్లా కుప్పం-వేపనపల్లె అటవీ ప్రాంతంలోని గుడుపల్లె మండలం ఓఎన్‌ కొత్తూరు అటవీ ప్రాంతంలో శనివారం రాత్రి ఓ కారుపై ఇద్దరు యువకులు దాడి చేశారు. బాధితుల వివరాల మేరకు.. కుప్పం పట్టణానికి చెందిన దంపతులు కారులో బెంగళూరు వెళ్లి రాత్రికి తిరిగి కుప్పం వస్తున్న క్రమంలో అటవీ ప్రాంతంలో ఇద్దరు యువకులు అటకాయించారు. యువకుల వ్యవహరశైలితో భయపడ్డ దంపతులు కారును ముందుకు నడపడంతో రాళ్లతో కారుపై యువకులు దాడి చేసినట్లు పేర్కొన్నారు. భయాందోళనకు గురై పగిలిన అద్దాలతో వస్తుండగా ఆ యువకులు కారును ద్విచక్రవాహనంపై వెంబడించారు. కుప్పం మండలం గుడ్లనాయనపల్లె స్థానికులు వారిని గుర్తించి పట్టుకుని పోలీసులకు అప్పగించారు. గుడుపల్లె మండలం ఓఎన్‌ కొత్తూరు గ్రామానికి చెందిన రాజశేఖర్‌, అజిత్‌గా స్థానికులు గుర్తించారు. దీనిపై రాజీ ప్రయత్నాలు జరుగుతున్నట్లు తెలిసింది.