పతనమవుతున్న టమోటా ధరలు

మార్కెట్‌లో నిల్వ ఉన్న టమోటా

పుంగనూరు గ్రామీణ, న్యూస్‌టుడే: మండు వేసవిలో టమోటా ధరలు పెరగాల్సి ఉండగా అందుకు భిన్నంగా మార్చి చివరిలో రోజురోజుకు పతనమవుతున్నాయి. పుంగనూరు వ్యవసాయ మార్కెట్‌లో ఆదివారం 15 కిలోల టమోటా పెట్టె గరిష్ఠ ధర రూ.140, కనిష్ఠంగా రూ.30 పలికింది. ఫిబ్రవరి నుంచి ధరలు తగ్గుముఖం పట్టాయి. కోస్తా, ఆంధ్ర, తమిళనాడు రాష్ట్రంలోనూ టమోటా దిగుమతులు ఎక్కువగా ఉండటంతో ఇక్కడి టమోటాకు డిమాండ్‌ పూర్తిగా పడిపోయిందని వ్యాపారులు చెబుతున్నారు. ఎకరాకు రూ.లక్ష నుంచి రూ.1.50 లక్షలు ఖర్చు చేసినా.. పెట్టబడులు కూడా రాక రైతులు నష్టపోతున్నారు. పరిస్థితి ఇలాగే కొనసాగితే తీవ్ర నష్టాలు చవిచూడాల్సి వస్తుందని వారు వాపోతున్నారు. వారం క్రితం కురిసిన వడగండ్ల వానకు పుంగనూరు ఉద్యానశాఖ వ్యవసాయ డివిజన్‌ పరిధిలో సుమారుగా 351 ఎకరాల టమోటా పంట నష్టం వాటిల్లినట్లు జిల్లా ఉద్యానశాఖ ఏడీ మధుసూదన్‌రెడ్డి పేర్కొన్నారు.