యథేచ్ఛగా అక్రమ కట్టడం

అధికారులను అడ్డుకున్న వైకాపా నాయకులు

ఈఎస్‌ఐ ప్రధాన ప్రవేశ ద్వారం వద్ద చేపడుతున్న నిర్మాణం

తిరుపతి(రెవెన్యూ), న్యూస్‌టుడే: ఆర్సీ రోడ్డు ఎమ్మార్‌పల్లి పోలీస్‌స్టేషన్‌కు సమీపంలోని ఈఎస్‌ఐ ఆసుపత్రి ప్రధాన ప్రవేశ ద్వారం వద్ద అక్రమ కట్టడం చర్చనీయాంశంగా మారాయి. నిన్నటి వరకు ఆ ప్రాంగణంలో చిన్నపాటి పార్కులా చెట్లతో కూడిన పచ్చటి పచ్చిక, ఆర్టీసీ బస్‌షెల్టర్‌, స్థలానికి అనుకునే నగరపాలిక ప్రజా మరుగుదొడ్లు ఉన్నాయి. తాజాగా ఆ స్థలంలో నిర్మాణాలు జరుగుతుండటంతో అటుగా వెళ్తున్న పలువురు ఆశ్చర్యానికి గురవుతున్నారు. దీనిపై పలువురు నగరపాలిక, రెవెన్యూ, పోలీసు అధికారులకు సమాచారం ఇవ్వడంతో అర్బన్‌ తహసీల్దార్‌ వెంకటరమణ ఆదేశాల మేరకు రెవెన్యూ ఆర్‌ఐ జానీబాషా ఘటన స్థలానికి చేరుకుని నిర్మాణాలను అడ్డుకునే ప్రయత్నం చేశారు. అయితే అధికార పార్టీకి చెందిన కొందరు నాయకులు రెవెన్యూ సిబ్బందిని అడ్డుకున్నారు. ఇక్కడి నుంచి వెళ్లిపోవాలని వాగ్వాదానికి దిగినట్లు సమాచారం. చేసేదేమి లేక రెవెన్యూ అధికారులు అక్కడ నుంచి వెళ్లిపోయారు.