గంజాయి నియంత్రణ బాధ్యత అధికారులదే: ఎస్పీ

సెబ్‌, పోలీసు అధికారులతో సమీక్షిస్తున్న ఎస్పీ పరమేశ్వరరెడ్డి

తిరుపతి(నేరవిభాగం): జిల్లాలో గంజాయి నియంత్రణ బాధ్యత అదనపు ఎస్పీలు, డీఎస్పీలు, స్టేషన్‌ అధికారులదే.. విధులు విస్మరిస్తే క్రమశిక్షణ చర్యలు తప్పవని ఎస్పీ పరమేశ్వరరెడ్డి హెచ్చరించారు. శుక్రవారం డీపీవోలో సెబ్‌, పోలీసు అధికారులతో గంజాయిపై సమీక్ష సమావేశం నిర్వహించారు. ఏ డివిజన్‌ పరిధిలో ఎంత మేరకు గంజాయి వినియోగం.. అక్రమ రవాణా సాగుతుంది.. ఎవరి ప్రమేయం ఎంత వరకు ఉందనే విషయాలను వెల్లడిస్తూ అధికారులను హెచ్చరించారు. ఈ సందర్భంగా ఎస్పీ మాట్లాడుతూ.. గంజాయి తాగినా.. విక్రయించినా.. అక్రమ రవాణా చేసినా.. అందుకు సహకరించినా చర్యలు తప్పవని తెలిపారు. కేసులు నమోదు చేయడంతోపాటు జిల్లా బహిష్కరణ చేసేలా చర్యలు చేపట్టాలని ఆదేశించారు. జిల్లా వ్యాప్తంగా పోలీసుల అధికారులు రోజూ సాయంత్రం 5 నుంచి 8 గంటల వరకు ప్రధాన కూడళ్లలో వాహనాలను తనిఖీ చేయాలని ఆదేశించారు. సమావేశంలో అదనపు ఎస్పీలు వెంకట్రావు, కులశేఖర్‌, మునిరామయ్య, రాజేంద్ర, ఎక్సైజ్‌ సూపరింటెండెంట్‌ డాక్టర్‌ స్వాతి, డీఎస్పీలు, సీఐలు పాల్గొన్నారు.