బాలికను రెండో పెళ్లి చేసుకున్న అధ్యాపకుడు

గంగవరం, న్యూస్‌టుడే: బాలికను ఓ అధ్యాపకుడు రెండో పెళ్లి చేసుకున్న ఉదంతమిది. మండలంలోని గుండుగల్లు పంచాయతీ బొమ్మనపల్లెకు చెందిన చలపతి (33) గంగవరంలోని ఓ ప్రైవేటు కళాశాలలో అధ్యాపకుడిగా పనిచేస్తున్నాడు. మూడేళ్ల క్రితం గ్రామానికి చెందిన యువతిని ప్రేమించి పెళ్లి చేసుకున్నాడు. వీరికి కుమారుడు సంతానం. ప్రస్తుతం భార్య గర్భిణి. ఇదే కళాశాలలో ఇంటర్‌ ద్వితీయ సంవత్సరం చదువుతున్న బాలిక(17)కు మాయమాటలు చెప్పి బుధవారం పరీక్షలు ముగిశాక బెంగళూరుకు తీసుకెళ్లి వివాహం చేసుకున్నాడు. విషయం తెలిసిన బాలిక తండ్రి పోలీసులకు ఫిర్యాదు చేయడంతో చలపతిని శుక్రవారం అదుపులోకి తీసుకుని పోక్సో చట్టం కింద కేసు నమోదు చేసినట్లు ఎస్‌ఐ సుధాకర్‌రెడ్డి తెలిపారు.