అంతర్రాష్ట్ర దొంగ అరెస్టు

44 చోరీ కేసులు.. రూ.40 లక్షల సొత్తు స్వాధీనం

స్వాధీనం చేసుకున్న బంగారు, వెండి వస్తువులు పరిశీలిస్తున్న ఎస్పీ తదితరులు

తిరుపతి(నేరవిభాగం): తాళం వేసిన ఇళ్లనే లక్ష్యంగా చేసుకుని రాత్రిళ్లు దొంగతనాలు చేస్తున్న ఓ అంతర్రాష్ట్ర దొంగను తిరుపతి పోలీసులు అరెస్టు చేశారు. అతను 44 కేసుల్లో నిందితుడిగా గుర్తించారు. దొంగ నుంచి రూ. 40 లక్షల విలువైన 793 గ్రాముల బంగారు, 1235 గ్రాములు వెండి ఆభరణాలను స్వాధీనం చేసుకున్నారు. కేసు వివరాలను డీపీవో శనివారం ఎస్పీ పరమేశ్వరరెడ్డి శనివారం విలేకర్లకు వెల్లడించారు. ఈ నెల 2వ తేదీ సాయంత్రం 3 గంటలకు అలిపిరి సీఐ అబ్బన్నకు అందిన సమాచారం మేరకు ఎస్‌ఐ చిన్న రెడ్డెప్ప, సిబ్బంది తిమ్మినాయుడు పాళెం బస్టాండు వద్దకు చేరుకున్నారు. వారిని చూసి పారిపోయేందుకు ప్రయత్నించిన వ్యక్తిని అదుపులోకి తీసుకుని విచారించగా విశాఖపట్నం జిల్లాలోని సీతంపేటకు చెందిన బోడబతుల శీను (34)గా గుర్తించారు. అతను ప్రస్తుతం మంగళం వెంకటేశ్వర కాలనీలో వాటర్‌ ట్యాంకు వద్ద నివాసం ఉంటున్నట్లు తెలుసుకున్నారు. తిరుపతిలోని పలు ప్రాంతాల్లో వరస చోరీలకు పాల్పడ్డట్లు అంగీకరించారు. 2010 నుంచి విశాఖపట్నం, రాజమహేంద్రవరం, విజయవాడ, తిరుచానూరు, తిరుపతి సీసీఎస్‌ పోలీస్‌ స్టేషన్ల పరిధిలో 35కు పైగా దొంగతనం కేసులు నమోదైనట్లు గుర్తించారు. పలు కేసుల్లో జైలు శిక్ష కూడా అనుభవించారు. ప్రస్తుతం అలిపిరి పోలీస్‌స్టేషన్‌ పరిధిలో 9 కేసులు నమోదు చేశారు. సీఐ అబ్బన్న, ఎస్‌ఐలు చిన్నరెడ్డెప్ప, జయచంద్ర, ఇమ్రాన్‌ బాష, సిబ్బందికి రివార్డులు అందజేశారు. అదనపు ఎస్పీ వెంకట్రావు, డీఎస్పీ సురేంద్రరెడ్డి పాల్గొన్నారు.