తాగునీరొచ్చి 21 రోజులైంది

ఆర్డీవో చంద్రమునికి సమస్య విన్నవిస్తున్న మహిళలు

సూళ్లూరుపేట, న్యూస్‌టుడే: ‘సా రూ.. మా గ్రామం లో తాగునీరొచ్చి 21 రోజులైంది.. ఎలా బతికేది.. మాకు ప్రభుత్వ సంక్షేమ పథకాలు లేకున్నా పర్వాలేదు.. కలుషిత నీరు తాగి వ్యాధుల బారిన పడుతున్నాం.. మీరైనా ఆదుకోండి’.. అంటూ సూళ్లూరుపేట మండలం చెరువుమిట్టకు చెందిన మహిళలు ఆర్డీవో చంద్రముని ఎదుట గురువారం ఆవేదన వ్యక్తం చేశారు. మాజీ సర్పంచి చిలకా యుగంధర్‌ ఆధ్వర్యంలో సుళ్లూరుపేట తరలివచ్చి సమస్య వివరించారు. పులికాట్‌ తీరంలో ఉన్న తమ గ్రామానికి గతంలో వారానికోసారి 12 బిందెలు చొప్పున తాగునీరు ఇచ్చేవారని, ప్రస్తుతం 21 రోజులైందని, వినాయక చవితి పండగకు సైతం బిందెడు తాగునీరు ఇవ్వలేదని ఆగ్రహం వ్యక్తం చేశారు. ఆర్డీవో పురపాలక కార్యాలయంలో ఉండటంతో  గంటకుపైగా చంటిబిడ్డలతో ఎండలోనే నిరీక్షించారు. ఆర్డీవో రావడంతో మహిళలు ఆయన్ను చుట్టుముట్టి ఆందోళన వ్యక్తం చేశారు. ఆర్డీవో ఆర్‌డబ్ల్యూఎస్‌ జేఈ ఉమామహేశ్వరికి ఫోన్‌చేసి ఆగ్రహం వ్యక్తం చేశారు. సమస్య రెండ్రోజుల్లో పరిష్కరిస్తామని హామీ ఇచ్చారు.