గాలి రాదు.. కుర్చీలు లేవు

పారామెడికల్‌ కౌన్సెలింగ్‌లో అభ్యర్థుల ఉక్కిరిబిక్కిరి

చెట్ల కింద నిల్చున్న విద్యార్థులు

ఈనాడు, చిత్తూరు-న్యూస్‌టుడే, చిత్తూరు(వైద్యం): జిల్లా కేంద్రంలోని డీఎంహెచ్‌వో కార్యాలయంలో మంగళవారం పారామెడికల్‌ కోర్సులకు కౌన్సెలింగ్‌ నిర్వహించారు. ఉమ్మడి జిల్లాలోని 18 ప్రైవేటు కళాశాలల్లోని 16 కోర్సులకు సంబంధించి 604 మంది దరఖాస్తు చేసుకోగా సుమారు 580 మందికి ప్లేస్‌మెంట్‌ ఇచ్చారు. డీఎంహెచ్‌వో ప్రభావతిదేవి, ఏవో విజయ్‌బాబు పర్యవేక్షించారు. కాగా.. కౌన్సెలింగ్‌ భవనం పైఅంతస్తులో నిర్వహించారు. ఉదయం 9 గంటలకే వచ్చిన అభ్యర్థులకు సరైన సౌకర్యాలు ఏర్పాటు చేయకపోవటంతో కొందరు హాలులో కూర్చున్నారు. అనేకమంది నిలబడలేక భవనం బయట చెట్ల కింద, వాహనాలపై, మెట్లపై, మందుల డబ్బాలపై, నేలపై పేపర్లు వేసుకుని ఎక్కడ పడితే అక్కడ కూర్చున్నారు. అనేక మంది అభ్యర్థులు తమను పిలుస్తారేమో అని కౌన్సెలింగ్‌ హాల్‌ ముందు నిరీక్షించారు. అక్కడ కనీసం ఫ్యాన్లు కూడా తిరగకపోవటంతో ఉక్కపోతకు ఉక్కిరిబిక్కిరి అయ్యారు.