దీక్షలో వనిత.. బాబు అరెస్టుకు వ్యతిరేకత

రిలే నిరాహారదీక్షలో మహిళలు

కాశిపెంట్లలో తెదేపా చేపట్టిన రిలే దీక్షలో మహిళలతో పులివర్తి సుధారెడ్డి

తిరుపతి(నగరం), న్యూస్‌టుడే: తెదేపా అధినేత చంద్రబాబు నాయుడు అక్రమ అరెస్టును వ్యతిరేకిస్తూ ఆ పార్టీ శ్రేణులు రోజుకో తీరున నిరసనలు చేపడుతున్నారు. మంగళవారం తిరుపతి పాత నగరపాలక సంస్థ కార్యాలయం ఎదుట జరిగిన రిలే నిరాహారదీక్షలో మాజీ ఎమ్మెల్యే సుగుణమ్మ, పార్టీ నేత నరసింహయాదవ్‌ తదితరులు చెవిలో పువ్వులు పెట్టుకుని ప్రభుత్వానికి వ్యతిరేకంగా నిరసన వ్యక్తం చేశారు. అంతకుముందు నగరంలోని కరుమారియమ్మ ఆలయంలో చంద్రబాబు కోసం తెలుగు మహిళలు ప్రత్యేక పూజలు నిర్వహించారు. చంద్రగిరిలోని బస్టాండ్‌ కూడలి వద్ద ఆ పార్టీ బాధ్యుడు పులివర్తి నాని సతీమణి సుధారెడ్డి ఆధ్వర్యంలో జరిగిన దీక్షలో పెద్దసంఖ్యలో మహిళలు పాల్గొన్నారు. గూడూరులోని తెదేపా కార్యాలయంలో మాజీ ఎమ్మెల్యే సునీల్‌కుమార్‌ ఆధ్వర్యంలో, వెంకటగిరిలో నియోజకవర్గం రావూరులో మాజీ ఎమ్మెల్యే రామకృష్ణ ఆధ్వర్యంలో దీక్షలు చేశారు. శ్రీకాళహస్తిలోని తెదేపా కార్యాలయం వద్ద తొట్టంబేడు మండలానికి చెందిన ఆ పార్టీ నేతలు దీక్షలో పాల్గొన్నారు. పార్టీ బాధ్యుడు బొజ్జల సుధీర్‌రెడ్డి పాల్గొన్నారు. తొట్టంబేడు మండలానికి చెందిన తంగేళ్లపాలెం వద్ద ఆ పార్టీ నాయకులు జలదీక్ష చేసి నిరసన వ్యక్తం చేశారు. సూళ్లూరుపేట తెదేపా కార్యాలయంలో చంద్రబాబు ఆరోగ్యం కోసం రుద్రాభిషేకం నిర్వహించారు. మాజీ మంత్రి పరసారత్నం, నియోజకవర్గ ఇన్‌ఛార్జి నెలవల సుబ్రహ్మణ్యం, పార్టీ రాష్ట్ర కార్యదర్శి సతీష్‌రెడ్డి తదితరులు పాల్గొన్నారు. సత్యవేడులోని  పార్టీ కార్యాలయం వద్ద జరిగిన దీక్షలో  పార్టీ బాధ్యురాలు హెలెన్‌ నాయకులు  పాల్గొన్నారు.