Cyber Crime: ‘ది కశ్మీర్‌ ఫైల్స్‌’ లింక్స్‌తో జర భద్రం!

సామాజిక మాధ్యమాల ద్వారా పోలీసుల అవగాహన

ఈనాడు, హైదరాబాద్‌: ఆధార్‌ కార్డు, బ్యాంకు కేవైసీ, కరోనా టీకా.. ఇలా ప్రతి అంశాన్ని సైబర్‌ మాయగాళ్లు అనుకూలంగా మలచుకుని రూ.లక్షలు కాజేస్తున్నారు. ప్రస్తుతం ‘ది కశ్మీర్‌ ఫైల్స్‌’ సినిమా లింక్‌ రూపంలో మోసాలకు పాల్పడే అవకాశం ఉందని రాచకొండ పోలీసులు హెచ్చరిస్తున్నారు. వాట్సాప్‌ ద్వారా వచ్చే సందేశాలపట్ల అప్రమత్తంగా ఉండాలని సూచిస్తున్నారు. దిల్లీ, నోయిడాల్లో హ్యాకర్లు ‘ది కశ్మీర్‌ ఫైల్స్‌’ను ఉచితంగా చూడొచ్చంటూ లింకులు పంపి స్మార్ట్‌ఫోన్లను హ్యాక్‌ చేసి బ్యాంకు ఖాతాలను ఖాళీ చేసినట్టు పోలీసులు తెలిపారు. దీంతో ఫేస్‌బుక్, ట్విటర్‌ ద్వారా అవగాహన కల్పిస్తున్నట్టు వివరించారు. మోసపోయినట్టు గుర్తించగానే సైబర్‌ క్రైమ్‌ సహాయ కేంద్రం 1930కు ఫోన్‌ చేసి ఫిర్యాదు చేయాలన్నారు.