‘మంత్రి క్షమాపణ చెప్పాల్సిందే’

తునిలో నిరసన వ్యక్తం చేస్తున్న వీఆర్వోలు

తుని గ్రామీణం: వీఆర్వోల మనోభావాలను దెబ్బతీసిన మంత్రి అప్పలరాజు బహిరంగ క్షమాపణ చేపాల్సిందేనని పెద్దపురం డివిజన్‌ వీఆర్వోల సంఘం అధ్యక్షుడు చంటిబాబు డిమాండ్‌ చేశారు. శనివారం తహసీల్దారు కార్యలయం వద్ద ఆరుబయట విధులు నిర్వహిస్తూ నిరసన వ్యక్తం చేశారు. ఈ సందర్భంగా ఆయన మాట్లాడుతూ రెవెన్యూ ఉద్యోగులను చులకనగా చూస్తే ఉపేక్షించేది లేదన్నారు. మండల సంఘం అధ్యక్షుడు సత్యనారాయణ, సభ్యులు పాల్గొన్నారు.
ప్రత్తిపాడు, శంఖవరం: సచివాలయాలకు వెళ్లకుండా తహసీల్దారు కార్యాలయం ఆవరణలోనే వీఆర్వోలు విధులు నిర్వర్తిస్తూ నిరసన తెలిపారు. సంఘ నాయకులు దిలీప్, సాయివర్మ, దుర్గాప్రసాద్, జక్కయ్య పాల్గొన్నారు. శంఖవరంలో వీఆర్వోలు మాట్లాడుతూ మంత్రి వ్యాఖ్యలను ఖండిస్తున్నామన్నారు. 
కిర్లంపూడి: మంత్రి అప్పలరాజు వ్యాఖ్యలను నిరసిస్తూ మండలంలోని వీఆర్వోలు నల్లబ్యాడ్జీలు ధరించి నిరసన చేపట్టారు. మంత్రి క్షమాపణ చెప్పేంత వరకు నిరసన కొనసాగిస్తామని ఆ  సంఘం అధ్యక్షుడు మందేటి గుర్రయ్య తెలిపారు.