పీఆర్‌సీ నివేదిక ప్రతుల దహనం

నిరసనలో పాల్గొన్న యూటీఎఫ్‌ నాయకులు

కాకినాడ నగరం, న్యూస్‌టుడే: పీఆర్‌సీకి సంబంధించి అధికారుల కమిటీ ఇచ్చిన నివేదిక ప్రతులను భోగి మంటల్లో వేసి యూటీఎఫ్‌ నాయకులు శుక్రవారం నిరసన తెలిపారు. ఫ్యాప్టో రాష్ట్ర కమిటీ పిలుపు మేరకు యూటీఎఫ్‌ హోమ్‌ వద్ద నిరసన చేపట్టారు. ఆ సంఘ రాష్ట్ర కార్యదర్శి జి.ప్రభాకరవర్మ మాట్లాడుతూ పీఆర్‌సీపై అధికారుల కమిటీ ఇచ్చిన నివేదికను ఉద్యోగ, ఉపాధ్యాయ సంఘాలు ఆమోదించడంలేదన్నారు. ఫిట్‌మెంట్‌ ఐఆర్‌ కంటే ఎక్కువ ఉండాలన్నారు. హెచ్‌ఆర్‌ఏ స్లాబులను యథాతథంగా కొనసాగించాలని కోరారు. ఫ్యాప్టో పిలుపు మేరకు ఈ నెల 20న కలెక్టరేట్‌, 28న సచివాలయ ముట్టడికి కార్యాచరణను రూపొందించినట్లు తెలిపారు. ఈ కార్యక్రమంలో సంఘ నాయకులు పీవీఎన్‌ గణేశ్వరరావు, పి.రాజబాబు, సమ్మంగి శ్రీరాములు, కె.పెద్దిరాజు, జి.నాగేంద్ర, నాగప్రసాద్‌, తదితరులు పాల్గొన్నారు.