తిరుగు ప్రయాణాలకు ప్రత్యేక సర్వీసులు

రాజమహేంద్రవరం ప్రధాన బస్టాండులో రద్దీ

వి.ఎల్‌.పురం, న్యూస్‌టుడే: సంక్రాంతి పండగకు వివిధ ప్రాంతాల నుంచి జిల్లాకు వచ్చి తిరిగి వెళ్లే ప్రయాణికుల కోసం ఆర్టీసీ ప్రత్యేక బస్సు సర్వీసులు ఏర్పాటు చేసింది. దక్షిణమధ్య రైల్వే జిల్లా మీదుగా ఈ నెలాఖరు వరకు ఆయా తేదీల్లో ప్రత్యేక రైళ్లను నడపనుంది. తిరుగు ప్రయాణాల దృష్ట్యా ఇప్పటికే జిల్లా ఆర్టీసీ ఈ నెల 16 నుంచి 18 వరకు మూడు రోజుల పాటు 150 వరకు ప్రత్యేక సర్వీసులు నడిపేందుకు ప్రణాళిక సిద్ధం చేసింది. ఆదివారం వివిధ డిపోల నుంచి హైదరాబాద్, విశాఖపట్నం, విజయవాడ తదితర దూరప్రాంతాలకు 72 సర్వీసులు నడిచాయి. వీటిలో హైదరాబాద్‌కు 28, విశాఖకు 26, విజయవాడకు 16 బస్సులు, ఇతర దూరప్రాంతాలకు మరో రెండు ప్రత్యేక బస్సులు తిప్పినట్లు ఆర్టీసీ అధికారులు తెలిపారు. 17, 18 తేదీల్లో జిల్లా నుంచి హైదరాబాద్‌కు ప్రస్తుతం 28 ప్రత్యేక సర్వీసులు ఏర్పాటు చేశారు. డిమాండ్‌ను బట్టి వీటిని పెంచుకుంటూ వెళ్తామని, విశాఖ, విజయవాడ తదితర ప్రాంతాలకు కూడా ప్రయాణికుల రద్దీని బట్టి ఎప్పటికప్పుడు ప్రత్యేక బస్సులు, అదనపు సర్వీసులు ఏర్పాటు చేస్తామని చెబుతున్నారు. ఇటు రైల్వేశాఖ పలు ప్రత్యేక రైళ్లను నడుపుతోంది. ఆదివారం జిల్లామీదుగా లింగంపల్లి-కాకినాడ(07492), అగర్తలా-సికింద్రాబాద్‌(07029), విశాఖపట్నం-ఎలహంకా (08577), కాకినాడ-సికింద్రాబాద్‌(82727), అనకాపల్లి-సికింద్రాబాద్‌(07436) ప్రత్యేక రైళ్లు నడిచినట్లు రైల్వే అధికారులు తెలిపారు.