Crime News: శ్మశానంలో కోడిపందేలు.. వ్యక్తి మృతితో ‘బరి’మార్పు

కొమరగిరి(కొత్తపల్లి), న్యూస్‌టుడే: కోడిపందేలు నిర్వహించాలనుకున్నారు. స్థలం దొరకలేదు. దాంతో శ్మశానంలో ఏర్పాటు చేశారు. తీరా.. గ్రామంలో ఓ వ్యక్తి మృతిచెందడంతో పందేల బరిని మార్చాల్సివచ్చిన ఉదంతమిది. వివరాల్లోకి వెళ్తే.. యు.కొత్తపల్లి మండలం కొమరగిరిలో స్థానిక నాయకుల అండతో సంక్రాంతి సందర్భంగా కోడిపందేలు నిర్వహిస్తున్నారు. ఆదివారం గ్రామానికి చెందిన ఒకరు చనిపోయారని తెలియడంతో చేసేదిలేక మరోచోటకు పందేలను మర్చారు. ఆ తరువాత మృతుని కుటుంబీకులు అంత్యక్రియలు పూర్తిచేశారు. ఇదిలా ఉండగా.. పందేలకోసమని శ్మశానం అనుకుని ఉన్న ఆరు సామూహిక మరుగుదొడ్లను కూల్చివేయడంపై శుక్రవారం సర్పంచి నిలదీయడంతో పందేల నిర్వహణ చర్చనీయాంశమైంది. స్థానికులు విస్మయం వ్యక్తం చేస్తున్నారు.