500 ఎకో క్లబ్‌లకు నిధులు

పామర్రు, న్యూస్‌టుడే: జిల్లాలోని 500 పాఠశాలల్లో నడుస్తున్న ఎకో క్లబ్‌ల నిర్వహణకు రూ.25 లక్షలు మంజూరైనట్లు జిల్లా విద్యాశాఖాధికారి సలాంటి అబ్రహం వెల్లడించారు. ఒక్కో క్లబ్‌కు రూ.5000 చొప్పున వచ్చాయన్నారు. ఇందులో రూ.2000 నీలం, ఆకుపచ్చ చెత్త బుట్టల కొనుగోలుకు వెచ్చించాల్సి ఉంటుందన్నారు. దీని నిమిత్తం రాష్ట్రవ్యాప్త టెండరు ద్వారా ఖరారైన సంస్థకు చెల్లించాల్సి ఉంటుందన్నారు. ఈ బుట్టలను ఆయా పాఠశాలల వారు సంబంధిత విద్యాశాఖ డివిజన్‌ కేంద్రాల్లో తీసుకోవాలని చెప్పారు. మిగిలిన వాటిలో రూ.500ను బ్యానర్‌ రాయించడానికి, మరో రూ.2,500ను పర్యావరణ దినోత్సవాల నిర్వహణ, ఆవరణలో మొక్కలు నాటడం, పరిశుభ్రత కార్యక్రమాలకు వినియోగించాల్సి ఉంటుందన్నారు. నిబంధనల ప్రకారమే ప్రధానోపాధ్యాయులు సంబంధిత మొత్తాన్ని ఖర్చు చేయాలని జిల్లా గ్రీన్‌కోర్‌(పచ్చదళం) సమన్వయకర్త కేసరి శ్రీనివాసరావు తెలిపారు.