ఆర్టీసీకి సంక్రాంతి

వి.ఎల్‌.పురం(రాజమహేంద్రవరం): సంక్రాంతి ప్రత్యేక సర్వీసుల ద్వారా జిల్లా ఆర్టీసీకి రూ.1,16,20,008 అదనపు రాబడి సమకూరింది. షెడ్యూల్‌ బస్సు సర్వీసు ద్వారా జిల్లా ఆర్టీసీ రోజువారీ ఆదాయం రూ.1.05 కోట్ల వరకు వస్తుంది. పండగ రద్దీ దృష్ట్యా ఈ నెల 7 నుంచి 19వ తేదీ వరకు జిల్లాలోని తొమ్మిది డిపోల నుంచి హైదరాబాద్‌, విశాఖపట్నం, విజయవాడ, విజయనగరం, శ్రీకాకుళం తదితర దూరప్రాంతాలకు మొత్తం 466 ప్రత్యేక బస్సులను 3,02,991 కిలోమీటర్ల మేర తిప్పారు.

హైదరాబాద్‌కు నాలుగు... జిల్లాలోని ఆయా డిపోల నుంచి ప్రతిరోజూ హైదరాబాద్‌కు 28 షెడ్యూల్‌ బస్సులు నడుస్తున్నాయి. కాగా గురువారం హైదరాబాద్‌కు వెళ్లే ప్రయాణికుల సంఖ్య ఎక్కువగా ఉండటంతో అదనంగా మరో నాలుగు బస్సులు ఏర్పాటు చేసినట్లు డిప్యూటీ సీటీఎం వరప్రసాద్‌ తెలిపారు. ప్రయాణికుల సౌకర్యార్థం రాజమహేంద్రవరం, అమలాపురం, రాజోలు, ఏలేశ్వరం డిపోల నుంచి ఒక్కొక్కటి చొప్పున అదనపు సర్వీసులను హైదరాబాద్‌కు నడిపినట్లు చెప్పారు.