ఉపాధి పనులపై కేంద్రం నిఘా

తుని మండలం లోవ కొత్తూరులో పరిశీలిస్తున్న కేంద్ర బృందం సభ్యులు

కాకినాడ కలెక్టరేట్‌: ఉపాధి హామీ కింద చేపట్టిన వివిధ పనులు, ప్రధాన మంత్రి ఆవాస్‌ యోజన కింద నిర్మించిన ఇళ్లను కేంద్ర బృందం (జాతీయ స్థాయి పర్యవేక్షణ బృందం) తనిఖీ చేస్తోంది. ఈ నెల 17న కేంద్ర బృందం సభ్యులు ధన్‌శ్యామ్‌పఠాక్‌, జయ్‌కుమార్‌ జిల్లాకు చేరుకుని డ్వామా కార్యాలయంలో ఉపాధి హామీ అధికారులు, సిబ్బందితో సమీక్షించారు. ఈ నెల 18 నుంచి క్షేత్రంలోతనిఖీలు ప్రారంభించారు. తుని, కోటనందూరు, జగ్గంపేట, పిఠాపురం మండలాల్లో..ఒక్కోచోట అయిదేసిగ్రామాలను ఎంపిక చేశారు. అక్కడ ఉపాధి హామీ అనుసంధానం పనులను తనిఖీ చేస్తున్నారు. గురువారం లోవకొత్తూరులో ఈ బృందం పనులను పరిశీలించింది. ప్రస్తుతం జరుగుతున్న పనుల్లో మార్పులు, చేర్పులు, ఇతర అంశాలు గుర్తించి కేంద్రానికి నివేదిక ఇవ్వనున్నారు. గురువారం నిర్వహించిన తనిఖీల్లో డ్వామా అదనపు పీడీ మొఖలింగం పాల్గొన్నారు.