పులొచ్ఛె. జర భద్రం

పులి అడుగు జాడ

వరరామచంద్రాపురం, న్యూస్‌టుడే: అటవీ ఉత్పత్తులపై ఆధారపడి ప్రశాంతంగా జీవించే మన్యంలోని వీఆర్‌పురం మండల వాసులకు.. పులి తిరుగుతోంది. ఎట్టి పరిస్థితుల్లోనూ అడవిలోకి ఎవరూ వెళ్లవద్దంటూ స్థానిక రేంజర్‌ శ్రీనివాసరెడ్డి చేసిన హెచ్చరికలు కంటికి కునుకులేకుండా చేస్తున్నాయి. శుక్రవారం ఆయన తెలిపిన వివరాల ప్రకారం.. ఇక్కడి చిన్నమట్టపల్లి గ్రామం సమీపంలోని అటవీ ప్రాంతంలో ఓ గిరిజనుడికి పులి కనిపించిందనే సమాచారం అందింది. దాంతో అటవీశాఖ సిబ్బంది బృందంగా వెళ్లి పరిశీలించగా పులి అడుగుజాడలను గమనించారు. స్థానికంగా సామాజిక మాధ్యమంలో పెట్టిన ఫొటోలు మాత్రం ఇక్కడివి కావన్నారు. సమీప ప్రాంతాల ప్రజలు అప్రమత్తంగా ఉండాలని, పశువులను అడవిలోకి మేతకు తీసుకువెళ్లవద్దని సూచిస్తున్నామని రేంజర్‌ పేర్కొన్నారు.