3 కిలోమీటర్ల దూరం పిల్లల్ని ఎలా పంపాలి..?

కలెక్టర్‌కు వినతిపత్రం ఇస్తున్న విద్యార్థుల తల్లిదండ్రులు

రాజానగరం: ‘రెక్కాడితేగానీ.. డొక్కాడని కుటుంబాలు మావి. పనికి వెళ్లకపోతే పస్తులు ఉండాల్సిందే.. ఈ పరిస్థితుల్లో మా పిల్లలను మూడు కిలోమీటర్ల దూరంలోని ఉన్నత పాఠశాలకు రోజూ ఎలా తీసుకువెళ్లగలమని’కొత్తతుంగపాడు ఎంపీపీ పాఠశాలవిద్యార్థుల తల్లిదండ్రులు కలెక్టర్‌ హరికిరణ్‌కు విజ్ఞప్తి చేశారు. అక్కడికి పంపించేందుకు రవాణా సౌకర్యమూ లేదని, దయచేసి మా పిల్లలను ఇదే పాఠశాలలో కొనసాగించాలని కోరారు. ప్రభుత్వ భవనాల ప్రారంభానికి శనివారం కొత్తతుంగపాడు వచ్చిన కలెక్టర్‌ను ఆ గ్రామంలోని 3, 4, 5 తరగతుల పిల్లల తల్లిదండ్రులు కలిసి వినతిపత్రం అందజేశారు.కొత్తతుంగపాడు నుంచి 3, 4, 5 తరగతుల పిల్లలు 80 మంది వరకు మూడు కి.మీ. దూరంలోని పాతతుంగపాడు జడ్పీ ఉన్నత పాఠశాలకు వెళ్లాలని ఉపాధ్యాయులు చెబుతున్నారన్నారు. దీనిపై కలెక్టర్‌ హరికిరణ్‌ స్పందిస్తూ ఇప్పుడు నేను చెప్పినా.. తాత్కాలికంగా ఉంచుతారే తప్ప, కొద్దిరోజుల తర్వాతైనా వేరే పాఠశాలకు పంపక తప్పదన్నారు. నూతన విద్యా విధానంలో భాగంగా ప్రభుత్వ ఆదేశాలను రాష్ట్రవ్యాప్తంగా అమలు చేయక తప్పదని వారికి వివరించారు.